رباعیات اکبر الہ آبادی

اکبر الٰہ آبادی

بے سود ہے گنج و مال و دولت کی تلاش
ذلّت ہے دراصل جاہ و شوکت کی تلاش
اکبر تو سرورِ طبع کو علم میں ڈھونڈ
محنت میں کر سکون و راحت کی تلاش

غفلت کی ہنسی سے آہ بھرنا اچھّا
افعالِ مضر سے کچھ نہ کرنا اچھّا
اکبر نے سنا ہے اہلِ غیرت سے یہی
جینا ذلّت سے ہو تو مرنا اچھّا

اونچا نیت کا اپنی زینہ رکھنا
احباب سے صاف اپنا سینہ رکھنا
غصّہ آنا تو نیچرل ہے اکبر
لیکن ہے شدید عیب کینہ رکھنا