انسان کو چاہیے نہ ہمت ہارے
میدان طلب میں ہاتھ بڑھ کر مارے
جو علم و ہنر میں لے گئے ہیں بازی
ہر کام میں ہیں انہیں کے وارے نیارے
گَر نیک دلی سے کچھ بھلائی کی ہے
یا بد منشی سے کچھ برائی کی ہے
اپنے ہی لئے ہے سب نہ اوروں کے لئے
اپنے ہاتھوں نے جو کمائی کی ہے
حب دنیا نشان خامی ہے
یہ قول کسی بزرگ کا سچا ہے
ڈالی سے جدا نہ ہو تو پھل کچا ہے
چھوڑی نہیں جس نے جب دنیا دل سے
گو ریش سفید ہو مگر بچا ہے
اسلاف پر فخر بیجا
اسلاف کا حصہ تھا اگر نام و نمود
پڑھتے پھرو اب ان کے مزاروں پہ درود
کچھ ہاتھ میں نقد رائج الوقت بھی ہے
یا اتنی ہی پونجی، پدرم سلطاں بود
مرا رب
یہ بادِ صبا کون چلاتا ہے، مرا رب
گلشن میں کلی کون کھلاتا ہے، مرا رب
مکھی کو بھلا شہد بنانے کا سلیقہ
تم خود ہی کہوں کون سکھاتا ہے، مرا رب
برساتا ہے بادل کو اثرؔ خشک زمیں پر
گل بوٹے کہوں کون اگاتا ہے، مرا رب
خوشحال کو خوشحال کیا کس نے بتاؤ
غمگین کا غم کون مٹا ہے، مرا رب
مانا کہ سما سکتا نہیں ارض و سما میں
پر ٹوٹے ہوئے دل میں سماتا ہے مرا رب
اک پردۂ شب کو گراتا ہے سرِ شام
سورج کا دیا کون جلاتا ہے، مرا رب
صحرا کو مزین وہ بناتا ہے جبل سے
گلشن کو بھی پھولوں سے سجاتا ہے مرا رب
خود کھانے و پینے سے مبرا و منزہ
گو سب کو کھلاتا ہے پلاتا ہے مرا رب
ہے کون جو حاکم ہے بلا شرکتِ غیرے
یہ نظم و نسق کون چلاتا ہے مرا رب
ستّار ہے عاصی کو وہ رسوا نہیں کرتا
بندے کے معائب کو چھپاتا ہے مرا رب
ولیوں سے کبھی خالی نہیں رہتی ہے دنیا
اک جائے تو دوجے کو بٹھاتا ہے مرا رب
ماں جھوٹ بول بول کے جنت میں جائے گی
شاعر ،،،،فرحان دل
کھانا ہمیشہ وقت سے پہلے پکائے گی
ہاتھوں سے اپنے سب کو نوالے کھلائے گی
بچوں سے یہ کہے گی "مجھے بھوک ہی نہیں"
بھوکی رہے گی پھر بھی بہانے بنائے گی
کھانا اگر بچے گا تو آخر میں کھائے گی
ماں جھوٹ بول بول کے جنت میں جائے گی
تہوار ہو تو جائے گی لوگوں کے پاس یہ
لائے گی اپنے بچوں کی خاطر لباس یہ
ہونے نہ دے گی اوروں کو احساس کرب کا
ہر غم اکیلے سہہ کے رہے گی اداس یہ
اپنی تمام خواہشیں دل میں دبائے گی
ماں جھوٹ بول بول کے جنت میں جائے گی
بیمار ہو تو درد چھپاتی رہے گی یہ
اور خود کو تندرست بتاتی رہے گی یہ
کوشش کرے گی خوش نظر آنے کی ہر گھڑی
لہجے کوبھی شگفتہ بناتی رہے گی یہ
جب بھی نظر ملائے گی یہ مسکرائے گی
ماں جھوٹ بول بول کے جنت میں جائے گی
غربت میں کب یہ چین سے سوئے گی رات بھر
بستر میں منہ چھپا کے یہ روئے گی رات بھر
اللہ سے دعاؤں میں مانگے گی سب کا سکھ
تکیے کو آنسوؤں سے بھگوئے گی رات بھر
سوجی ہوئی نگاہوں کو سب سے چھپائے گی
ماں جھوٹ بول بول کے جنت میں جائے گی
بیٹے گئے جو دور تو دے گی دعائیں خوب
تصویر ان کی دیکھ کے لے گی بلائیں خوب
خط میں لکھے گی میں یہاں بالکل مزے میں ہوں
ہر دم دعا کرے گی کہ بیٹے کمائیں خوب
بیٹوں کا خط نہ آئے مگر یہ سنائے گی
ماں جھوٹ بول بول کے جنت میں جائے گی
بیٹے بھلے ہی لاکھ ستاتے رہیں اسے
اعمال ان کے خون رلاتے رہیں اسے
بیوی کے ناز نخرے اٹھانے کے شوق میں
تا عمر بے وقوف بناتے رہیں اسے
ہر حال میں انہیں بہت اچھا بتائے گی
ماں جھوٹ بول بول کے جنت میں جائے گی
عدم سے جانبِ ہستی تلاشِ یار میں آئے
کھلی آنکھیں تو دیکھا، وادیٔ پُر خار میں آئے
یقیں ہے کچھ نہ کچھ رحمت مزاجِ یار میں آئے
ادب سے ہاتھ باندھے ہم ترے دربار میں آئے
اگر بخشے زہے رحمت نہ بخشے تو شکایت کیا
سرِ تسلیم خم ہے، جو مزاجِ یار میں آئے
نہ پوچھو اہلِ محشر ہم سے دیوانہ کی بیتابی
یہاں مجمع سنا، یاں بھی تلاشِ یار میں آئے
عدم کے جانے والو! بزمِ جاناں تک اگر پہنچو
ہمیں بھی یاد رکھنا، ذکر جو دربار میں آئے
نہ مانگو بوسہ اے آتشؔ بگاڑے منہ وہ بیٹھے ہیں
قیامت ہے اگر بَل ابروئے خمدار میں آئے
خواجہ حیدر علی آتشؔ
